Ugwetshwe udilikajele owesilisa owadlwengula udadewabo wentombi yakhe oneminyaka engu-12
Owesilisa oneminyaka engu-28 ubudala wathatha intombazane eneminyaka engu-12 ubudala wayisa esigangeni lapho ayidlwengula khona, wayisabisa ukuthi ingatsheli muntu.
Inkantolo yeMantshi yasePretoria North namuhla igwebe owesilisa, 28, wase-Akasia udilikajele ngecala lokudlwengula udadewabo wentombi yakhe, 12.
Lesi sigameko senzeka ngomhlaka 1 Julayi 2021 ngesikhathi intombazane ivakashele udadewabo ogulayo e-Akasia, lapho yayihlala khona nesoka layo. Isoka kanye nentombazane baphelezele owesifazane emtholampilo eSoshanguve.
“Ngesikhathi befika emtholampilo, isoka nesisulu bebengavunyelwe ukungena ngenxa yemikhawulo yeCovid.
“Ngesikhathi besalinde ngaphandle umsolwa wacela intombazane ukuthi ihambe nayo baye esigangeni esiseduze nalapho afike wayikhumula wayidlwengula wayixwayisa ukuthi ingatsheli muntu,” kusho okhulumela iNational Prosecuting Authority uLumka Mahanjana.
Ingane yabikela unina ngesigameko kanti umsolwa waboshwa ngoNovemba ngawo lowo nyaka. Selokhu agqunywe esitokisini.
Umsolwa akaliphikanga icala futhi watshela inkantolo ukuthi ukuya ocansini kwakuvumelene.
“Nokho, umshushisi uThamsanqa Given Twala ukuqinisekisile ukuthi umsolwa wayidlwengula ngempela intombazane,” kusho uMahanjana.
Inkantolo ithe ayitholanga zimo eziqinile neziphoqayo ukuthi ziphambuke esigwebo esinqunyiwe sokudilikelwa yijele.
Umqondisi wezokushushiswa komphakathi ePitoli, uSibongile Mzinyathi, uwushayele ihlombe umsebenzi womseshi wophiko oluthinta udlame lwemindeni, ukuvikelwa kwezingane kanye namacala ocansi eGa-Rankuwa, uConst Tsholofelo Chiloane, osize umbuso ukwazi ukuthola isigwebo nesigwebo.
