Owesilisa ugwetshwe udilikajele ngokubulala unkosikazi wakhe esiteshini samaphoyisa
Owesilisa ugwetshwe udilikajele ngokubulala unkosikazi wakhe esiteshini samaphoyisa eVanderbijlpark
Kugcine kwenziwe ubulungiswa njengoba uMbalo Mkuseli oneminyaka engu-46 ubudala egwetshwe udilikajele ngecala lokubulala ngesihluku unkosikazi wakhe emagcekeni esiteshi samaphoyisa eVanderbijlpark.
Lesi sigameko esishaqisayo senzeke ngeledlule lapho uMkuseli edinwe egane unwabu ejaha umkakhe emigwaqeni yaseVanderbijlpark, bagcina ngokubhekana ngeziqu zamehlo nokwaphetha ngempilo yakhe.
Ngokusho komphenyi wecala, uWarrant Officer Tumelo Mokoena, isisulu sabulawa ngenxa yokungaboni ngaso linye emshadweni kanye nesehlukaniso esisondele.
Engxoxweni ekhethekile, uMokoena uchaze ngokulandelana kwezigameko ezaholela ekugwetshweni kukaMkuseli, ecacisa ngokuphikelela kwakhe ukwenza ubulungiswa.
“Njengoba behlushwa ubuhlobo obuwohlokayo, obubhebhezelwa ukungathembeki, umbhangqwana wawuphokophele edivosini. Kuthe uMkuseli enikwa amaphepha edivosi wavele waqoma umkakhe,” kusho uMokoena.
“Ngelanga lesigameko, ngesikhathi bejahana eVanderbijlpark CDB, unkosikazi wakhosela egcekeni lesiteshi samaphoyisa. Ngeshwa, umyeni wakhe wamdubula wambulala ngokungenaluzwela,” enezela.
UMokoena, ekhuluma esehhovisi lakhe esiteshini samaphoyisa lapho kwenzeke khona inhlekelele, uzwakalise ukwaneliseka ngokuthi uphenyo lwakhe luholele ekushushisweni kwakhe ngempumelelo.
“Icala lami lokuqala lokugwetshwa udilikajele belifana naleli lakamuva. Kubandakanya izithandani ezihilizisana nezinkinga zobudlelwano, okwaholela ekutheni oyedwa alahlekelwe yimpilo yakhe,” kusho uMokoena.
“Ngeneme ngokuthi ubulungiswa benziwe. Uma umphakathi nemindeni yezisulu ithola ukuthi kuvalwe, kungilethela ukwaneliseka okukhulu,” kusho uMokoena.
UBrigadier Nikiwe Sefatsa, onguMkhuzi Wesiteshi eVanderbijlpark, uncome uMokoena ngokuzinikela nokukhuthala kwakhe ekuqinisekiseni ukuthi umenzi wobubi ubhekana nengalo yomthetho.
