Ubaba udubule unkosikazi wakhe phambi kwendodakazi yabo eneminyaka engu-10
Ubaba udubule unkosikazi wakhe phambi kwendodakazi yabo eneminyaka engu-10, wase ezidubula naye.
Isigameko esibuhlungu esenzeke eSaunders Circle eBelvedere, KwaZulu-Natal sishiye intombazane eneminyaka engu-10 iyintandane.
NgoLwesithathu ntambama, le ntombazanyana yaba sesigamekweni esinyantisayo sokubona kushona umama wayo ibulawa uyise. Ubaba ngokuhamba kwesikhathi washonela esibhedlela ngemuva kokuba naye ebhekise isibhamu ngakuye ngemuva kwengxabano eyaba nesenzo sobudlova sokubulala.
Ngemuva kokuzwa ukuqhuma kwesibhamu, amalungu omphakathi akhathazekile ashayele iRusa Tongaat Operations Centre, ebazisa ngenhlekelele eyenzeka.
Amaphoyisa athunyelwe ngokushesha afike endaweni yesigameko ngabo-17:58,” kusho abe-RUSA.
Uyise wengane ubesaphila ngesikhathi kufika usizo. Unikezwe usizo oluphuthumayo abezimo eziphuthumayo bophiko oluzimele lwama-ambulensi.
Ngokwakhe lo mlisa ubenenxeba lokuzidubula ekhanda.
Ngesikhathi indoda eyayilimele kanzima izinzile endaweni yesigameko, isesimweni esibucayi waphuthunyiswa esibhedlela ukuze aqhubeke nokwelashwa. Nokho, ngokuhamba kwesikhathi wagcina eshonile.
“I-Rusa ithole isiqiniseko sokuthi owesilisa owayelimele kanzima uhlonzwe njengoshonile ngesikhathi efika esibhedlela. Unina wendodakazi utholwe elele equlekile emgwaqeni ongenela izimoto, engakhombisi zimpawu zokuthi uyaphila kanti kuthiwa useshonile,” kusho uRusa.
Ngaphezu kwalokho, owesifazane okuthiwe ushonile endaweni yesigameko, ubenenxeba lokudutshulwa ekhanda.
Uphenyo luveze ukuthi laba abathintekayo kulesi sigameko esibuhlungu bebeshadile kodwa behlukene.
