ULvovo Derrango uthi usekulungele ukucula futhi ngemuva kokuhlaselwa yisifo sohlangothi

Umculi wekwaito waseNingizimu Afrika, uL’vovo Derrango, uthi usekulungele ukucula futhi, ngemuva konyaka echithe isikhathi enganandisi ngokomyalelo kadokotela ngemuva kokuhlaselwa yisifo sohlangothi ngoDisemba nyakenye.

Engxoxweni abe nayo neSunday World, uDerrango uthe indlela yakhe yokululama ibe yinde futhi inzima, njengoba ekuqaleni wayehloselwe ukugibela esiteji ngoJulayi kodwa wavinjwa udokotela wakhe.

“Angikaze ngingene esiteji kusukela ngoDisemba [2022]. Kulo nyaka ngesikhathi seDurban July [umcimbi womjaho wamahhashi], kudingeke ukuthi ngihoxe ekunandiseni ngenxa yemiyalelo kadokotela. Ngakho-ke, manje ngibone kukuhle kimina ukwazisa abahleli nabagqugquzeli ukuthi sengikulungele ukucula futhi,” usho kanje.

UDerrango uthe kuze kube manje, abantu abaningi sebezwakalise isifiso sabo sokuphinde bambone esiteji kulandela ukuyeka kwakhe.

“Ngicela ningibhukhe ezikhungweni zenu. Bengibazisa nje [abahleli bomcimbi] ukuthi sinezingoma esizikhiphile. Uma ubheka ezinkundleni zokuxhumana, lesi simemezelo senza abantu bavuleleka. Bajabule ngengikushilo futhi bafuna ngibhukhelwe amagigi,” usho kanje.

UDerrango uthe ukuphindela esiteji kuzoba wukubalekela eminye imikhakha ye-showbiz, okuhlanganisa nokulingisa, abekubheke ngabomvu ngaphambi kokushaywa yisifo sohlangothi.

Isithombe: Sicashunwe kwikhasi likaFacebook kaLvovo