URamaphosa usemise emsebenzini uMvikeli woMphakathi u-Busisiwe Mkhwebane ngokushesha
UMengameli uCyril Ramaphosa usemise u-Adv Busisiwe Mkhwebane esikhundleni ngokushesha.
Esitatimendeni iHhovisi likaMengameli lithe uMkhwebane uzoqhubeka nokumiswa kuze kuphothulwe uhlelo lwesigaba 194 ePhalamende likazwelonke.
“UMengameli uRamaphosa usifezile isibopho sakhe sokulalela u-Adv Mkhwebane ngokumnikeza isikhathi esanele nethuba lokwenza izethulo,” kusho isitatimende.
“Ekucubunguleni konke okuvezwe ngumvikeli womphakathi ngokucophelela, umengameli ubhekelele uhlobo lwehhovisi lomvikeli womphakathi kanye nezibopho zakhe ngokomthethosisekelo.
“Isigaba 2A (7) soMthetho Wokuvikela uMphakathi sithi noma nini lapho umvikeli womphakathi engakwazi ukwenza imisebenzi yehhovisi lakhe nganoma yisiphi isizathu, noma kusalindile ukuqashwa komuntu ehhovisi lomvikeli womphakathi, isekela lomvikeli womphakathi lizokwenza imisebenzi enjalo.”
IHhovisi likaMengameli lithe ukungabi khona kukaMkhwebane ngeke kuphazamise ukuqhubeka kophenyo olusalindile noma oluqhubekayo.
“UMengameli uRamaphosa kanye no-Advocate Mkhwebane bobabili banesibopho sokwenza izinto ezizuzisa izwe, ngokuhambisana noMthethosisekelo futhi baqaphele isidingo sokuvikela zonke izikhungo zomthethosisekelo. Isinqumo sikamengameli sokumisa u-Advocate Mkhwebane siyindlela engcono kakhulu yokufeza lezi zibopho. .”
Phambilini uMkhwebane uke waveza ukuthi uRamaphosa uxabene ngakho wangakwazi ukummisa emsebenzini.
Khonamanjalo, emzamweni wokugcina wokumisa uhlelo lokuqulwa kwakhe icala, uMkhwebane waya kwiKhomishini Yase-Afrika Ephathelene Namalungelo Abantu, esola iRiphabhulikhi yaseNingizimu Afrika ngokuhlukumeza amalungelo akhe ngokufuna ukumkhipha esikhundleni.
Uthe iNingizimu Afrika yephule amalungelo akhe ngaphansi kwesigaba 7(1) no-26 soMqulu wase-Afrika, esiphathelene nelungelo lomuntu lokuqulwa kwecala lakhe kanye nomsebenzi kahulumeni wokuqinisekisa ukuzimela kwezinkantolo.
“Ukwephulwa komthetho kuleli cala kwenzeka endaweni yommangalelwa [eNingizimu Afrika],” esho.
Ufuna ikhomishana ithole ukuthi umthetho, othinta ukuqokwa kwamajaji njengengxenye yesigungu esizimele, awuhambisani.
Uphinde wathi bekumele aqashe abameli kanye nama-advocate futhi uthole ukukhokhelwa kanye nezindleko zomthetho.
UMkhwebane usefuna iNingizimu Afrika ikhokhe u-R50 million “njengesinxephezelo samademeshe” kanye nezindleko zecala eNkantolo eNkulu yaseWestern Cape naseNkantolo yoMthethosisekelo.
