uLvovo Derrango usinde engozini yemoto izolo kusihlwa
Isihlabani se-kwaito esiphinde sibe ngusomabhizinisi uThokozani Ndlovu, odume ngelikaLvovo Derrango, ubandakanyeke engozini eyenzeke eNewcastle,enyakatho-ntshonalanga yeKwaZulu-Natal ngoLwesibili ebusuku.
Ingozi,yenzeke ngesikhathi uLvovo ehamba yedwa ngemoto yakhe yohlobo lwe-VW Polo esilver,ihilela iloli elingu-tipper eliqhele ngamakhilomitha angu-30 ukusuka kubo kanina.
Ekhuluma nephephandaba iSunday World esesibhedlela eNewcastle,isihlabani somculo wekwaito sithe iloli i-tipper ishayise izimoto zaphihliza imoto yaso.
“Bengihamba ngedwa ngigoduka ngoLwesibili ebusuku ngesikhathi iloli lifika kimina. Angikwazanga ukugwema ukushayisana,” esho.
“Ngisesibhedlela kumanje, kodwa sengingcono. Ngibonga uNkulunkulu nokhokho bami ngokuthi ngisindile kule ngozi.Ngibonga a bakithi ukuthi ngiphume ngiphila, njengoba abanye bengasindi ezingozini ezifuze lezi.”
ULvovo owaduma ngengoma ethi Bayang’sukela eyadidiyelwa wumculi nophrojusa wodumo uZakes Bantwini ngo-2007,ulimale okhalweni kanti bekulindeleke ukuthi ahlinzwe namuhla.
Amanye amahithi akhe ashisa izikhotha ahlanganisa u-Resista, Palesa, kanye no-The Boss.
NgoDisemba 2020, iSunday World yabika ukuthi uLvovo wasinda ngokulambisa kwenye ingozi enkulu yemoto emgwaqeni onguthelawayeka u-N2 ngaseScottburg KwaZulu-Natal.
