I-Post Office ngeke isakhokha izibonelelo zika-R350 emagatsheni ayo
Abantu bashaya ujenga bezokwamukela izibonelelo zikahulumeni zakwaSassa.
Ihhovisi lePosi laseNingizimu Afrika selimemezele ukuthi ngeke lisayikhokha imali yesibonelelo sikahulumeni ka-R350 ngamagatsha alo.
Ithi lesi sinyathelo sizosiza ekwehliseni olayini abade emagatsheni ayo, njengoba abaningi abathola lolu xhaso benezinketho eziningi zokuqoqa le mali.
Ihhovisi Leposi leluleke labo asebesifakile kabusha isicelo sabo sesibonelelo sikahulumeni ukuthi bangakhetha ukusilanda kunoma yiziphi izitolo zakwa-Pick n Pay, ezakwa-Boxer, zakwaShoprite noma zase-USave.
Ithi isicelo sivumela abahlomulayo ukuthi bakhethe lapho bafuna ukuthola khona imali yabo.
