Amaphoyisa ase-KZN aqaphe ngeso lokhozi kulandela ukufakwa kwama-voice notes nemiyalezo esongela udlame olubhekiswe ezitolo eziphethwe abokufika

Osomabhizinisi bakwamanye amazwe baxwayiswe ukuthi bangasebenzi ngeSonto.

Amaphoyisa azotshalwa ngobuchule ukuze aphendule ngokushesha kulabo abenza okuphambene nomthetho.

Amaphoyisa aKwaZulu-Natal aqaphe ngeso lokhozi ukuqinisekisa ukuphepha kulandela ukufakwa kwamaphimbo nemiyalezo esabisa ngodlame nobugebengu.

Izinhlobonhlobo zezinkulumo nemiyalezo mayelana nezinhlelo zokuvala amabhizinisi abokufika eThekwini kusabalale kabanzi ezinkundleni zokuxhumana.

Okhulumela amaphoyisa esifundazweni uBrigadier Jay Naicker uthe amaphoyisa nezinye izinhlaka zomthetho zikulungele ukubhekana nanoma yisiphi isigameko esingaba nomthelela ekwephuleni umthetho nokuhleleka.

“Amaphoyisa azotshalwa ngendlela efanele ukuze aphendule ngokushesha futhi abhekane nalabo abenza okuphambene nomthetho,” kwengeza uNaicker.

Uthe abomthetho bakubonile ukuthi uMasipala weTheku awukawugunyazi umcimbi okuhlelwe ukuthi ube ngeSonto eGugu Dlamini Park. Uthe abagqugquzeli bebengakayitholi imvume eMnyangweni wezamaPaki nokuNgcebeleka.

Abalandeli be-Operation Dudula,okuwumkhankaso obhekiswe kwabokufika, kulindeleke ukuthi balibangise eThekwini ngeSonto.Le nhlangano iqale eGoli kanti kulindeleke ukuthi ibe nomhlangano wokuqala eThekwini ngeSonto.

Izinhlangano zababaleki eThekwini zixwayise abokufika kuleli dolobha ukuthi bahlale emakhaya ngale mpelasonto ukuze baphephe.

Lezi zinhlangano zithi sezicele izizalwane zakwamanye amazwe ukuthi zingahlinzeki ngeSonto.

WP Radio
WP Radio
OFFLINE LIVE